"ဂါရဝတရား မပျောက်ကွယ်စေနဲ့"

ဂင်္ဂါဝါဠုသဲစုမကပွင့်တော်မူပြီးကြကုန်သော ရှေးရှေးသော မြတ်စွာဘုရားရှင်တို့မှစ၍ ဂေါတမမြတ်စွာဘုရား တိုင်အောင်သော ဘုရားရှင်များက ဟောတော်မူသော မင်္ဂလာတရား(၃၈)ပါးတွင်
“ဂါရဝေါစ နိဝါတောစ သန္တုဋ္ဌီစ ကတညုတာ
ကာလေန ဓမ္မဿဝနံ ဧတံမင်္ဂလမုတ္တမံ” ဟူသော မင်္ဂလာတရားတော်အရ ရှေးရှေးက လူကြီးသူမများသည် နံပါတ်(၁)ဖြစ်သော ဂါရဝမင်္ဂလာကို ဦးစားပေးခဲ့ပုံမှာ မိမိထက် အသက်ဂုဏ်ဝါ ကြီးမြတ်သော သူများအား ရိုသေမှု၊ ကိုင်းရှိုင်းမှု၊ မြတ်နိုးမှု၊ ရှိခိုးမှုများကို ဦးစားပေး၊ အလေးပေး၊ လေးစားခဲ့သည်မှာ ဗုဒ္ဓဘာသာဝင်တို့ အတွက် အလွန်နှစ်သက် ချစ်ခင်ဖွယ်ရာကောင်းသော အမူ အကျင့်များဖြစ်သည်။ ထိုအမူအကျင့်သည် မျက်မြင်မှာလည်း ချစ်ခင်ဖွယ်ကောင်းသည်၊ တမလွန်ဘဝမှာလည်း ကောင်းသော ဂတိသို့ သွားရောက်နိုင်သည်။

ဒါပေမယ့် ယခု ထိုထိုအရာများ တဖြည်းဖြည်း အားလျော့လာတော့သည်။ အားလျော့မှုတွေ အင်အားများ လာပါက အစဉ်အလာ ယဉ်ကျေးမှုတွေ ပျောက်ကွယ်သွားနိုင်ပါတယ်။ ထိုအစဉ်အလာယဉ်ကျေးမှုတွေ ပျောက်ကွယ်သွားပါလျှင် ဘာသာနှင့်လူမျိုးလည်း ပျောက်ကွယ်သွားနိုင်ပါတယ်။ ဗုဒ္ဓဘာသာဝင်တို့သည် “သဗ္ဘိရေဝ သမာသေထ၊ သဗ္ဘိ ကုဗ္ဗေထ သန္ထဝံ
သတံ သဒ္ဓမ္မ မညာယ သေယျော ဟောတိ နပါပိယော” ဟူသော ပါဠိတော်နှင့်အညီ ဘာသာတရားကို လေးစားသူ၊ ရိုသေကိုင်းရှိုင်းသူ၊ အလေးအမြတ်ဆည်းကပ်သူ၊ သူတော်ကောင်းနှင့်သာ ပေါင်းသင်းဆက်ဆံမှုပြုသူ၊ သူတော်ကောင်းတရားကိုသိသူများ ဤသူ-ဤသူများသာ လူမြတ်၊ မယုတ်မာသောသူ ဖြစ်နိုင်သည်။

ယနေ့မြို့မှ ပညာတတ် အယုတ် အလတ် အမြတ်မရွေး လူတော်တော်များများမှ အစပြု၍ ကျေးရွာအဆုံး မြန်မာတစ်နိုင်ငံလုံး လိုလို ဘာသာတရားကို ပစ်ပယ်လာကြသည်ကို ကိုယ်တွေ့ကြုံနေရပါပြီ။ ရှေးက အစပြုခဲ့သည့် ယဉ်ကျေးမှု အဆီအနှစ်ဖြစ်သည့် ဂါရဝတရား ခေါင်းပါးစပြုလာပြီ။ မျက်မြင်ကိုယ်တွေ့ ရေးပြရပါမူ လမ်းမှာတွေ့ရသော အသက်ကြီး၊ ဝါကြီးများကို အသာထား၊ ကိုယ့်အိမ်သို့ ကြွရောက်လာသော သက်ကြီး ဝါကြီး ပုဂ္ဂိုလ်များကို အသာထား၊ ရဟန်းတော်များကိုပင် ဝတ်ချရကောင်းမှန်း မသိ ဖြစ်နေတော့၏။ အားလုံးကိုမဆိုလို၊ ထိုသို့ဖြစ်လာရခြင်းမှာ “အရင်းစစ်တော့ အမြစ်မြေက” ဆိုသလို မိမိတို့၏ ယဉ်ကျေးမှုဖြစ်သော ဗုဒ္ဓဘာသာတရားကို ပစ်ပယ်၍၊ သူတစ်ပါးတို့၏ ယဉ်ကျေးမှုကို အထင်ကြီးလာခြင်းကြောင့်ပင်ဖြစ်တော့သည်။ တံလှပ်ကိုရေထင်၍ ရွှေမသင်အလိုက်မှားနေတာတော့ အတော်ပင် ဝမ်းနည်းစရာကောင်းလေစွ။

“အတ္တာဟိ အတ္တနော နာထော” မိမိကိုယ်သာ မိမိအားကိုးပါ။ သူတစ်ပါးဆိုတာ သူတစ်ပါးပါပဲ။ မိမိဘာသာကို မိမိအားကိုးပါ၊ သူတစ်ပါးဘာသာဆိုတာ သူတစ်ပါးဘာသာပါပဲ၊ မိမိ၏ နောင်တမလွန် အရေးကိုမူ သူတစ်ပါးက ဘယ်လိုနည်းနှင့်မှ လိုက်လုပ်မပေးနိုင်ပါဘူး။ မိမိဘာသာ မိမိယဉ်ကျေးမှု ကို အရေးထားပြီးလေးစားပါမှ၊ ရိုသေထိုက်သူကိုရိုသေပါမှ၊ ဒုစရိုက်တွေကို ရှောင်ကြဉ်ပါမှ၊ ရနိုင်ခဲသော တမလွန် ကောင်းကျိုး အားကိုးရာအစစ်ကို ကိုယ်တိုင်ရနိုင်ပါတယ်။ အရိုအသေပြုအပ်သူကို ရိုသေပါမှ ဘာသာတရားကို လေးစားသူပီသပါတယ်။

ဘာသာတရားကိုလေးစားပါမှ မြန်မာ့ယဉ်ကျေးမှုကို ဆက်လက်ထိန်းသိမ်းရာရောက်ပါတယ်။ ခေတ်တွေ စနစ်တွေ ဘယ်လိုပြောင်းပြောင်း၊ ဂါရဝေါစ ဟူသော မင်္ဂလာတရားတော်နှင့်အညီ မိမိထက် အသက်ဂုဏ်ဝါကြီးမြတ်သူ ရတနာသုံးပါး၊ မိဘဆရာနှင့် လူကြီးသူမများအား ရိုသေခြင်းတရားကို မပြောင်းစေနဲ့၊ မဟောင်းစေနဲ့၊ တံလျပ်ကို တံလျပ်လို့သာ မြင်၍ ရွှေသမင်အလိုက်မမှားစေနှင့်။
ဗုဒ္ဓဘာသာဖြစ်သည့် လူအစစ်တို့၏ စိတ်ထားမှာ ကိုယ့်ထက် မြင့်မြတ်သူကို ရိုသေဝပ်တွားကြသည်။ ထိုဂါရဝ တရားကို ရှေးလူကြီးသူမ-များ လက်တွေ့ပြုကျင့်ခဲ့ကြသည်။ ရဟန်းတော်များ၊ ကိုရင်များ၊ သက်ကြီးရွယ်အိုများ လမ်းမှာတွေ့ခဲ့ရင်တောင်မှ အရိုအသေပေးကြသည်၊ အရိပ်ကိုပင် မနင်းဝံ့သည်အထိ အရိုအသေပေးကြသည်။ အိမ်ကိုကြွလာပါလျှင်လည်း အိမ်ရှိလူကုန် ဝပ်ချကြသည်။ ထိုမှတဆင့် နိဝါတ၊ သန္တုဋ္ဌီ၊ ကတညုတာ၊ ကာလေနဓမ္မဿဝန စသော မင်္ဂလာတရားများကိုလည်း မဆိုင်းမတွ လက်တွေ့ပြုကျင့်ကြသည်။ဤသည်မှာ မြတ်စွာဘုရာဟော မင်္ဂလာငါးပါးကို လက်တွေ့ပြုကျင့်၍ နောင်တမလွန်အကျိုးစီးပွားကို ရှာယူခြင်းပင်ဖြစ်တော့၏။
ယခုမူကား ခေတ်ပညာသင် စာသင်ကျောင်းများမှအစ ဗုဒ္ဓမင်္ဂလာတရားများ ပျောက်ကွယ်စပြုလေပြီ၊ ငွေကြေး တစ်ပြားမှ ကုန်စရာမလိုဘဲ မွန်မြတ်တဲ့ယဉ်ကျေးမှုနှင့် နောင်ကောင်းကျိုးကို ဧကန်ရနိုင်သည့် ဂါရဝတရားများကို ပစ်ပယ်ထားကြသည်မှာ ဝမ်းနည်းစရာကောင်းလှ၏။ ထိုသို့မဖြစ်ရလေအောင် ရဟန်းတော်များမှ မိမိဒကာ ဒကာမများအား ဂါရဝတရားများလက်ကိုင်ထားနိုင်လာအောင် မိမိကိုယ်တိုင် ရတနာသုံးပါး၊ မိဘဆရာသမားနှင့် သက်တော်ဝါတော်ကြီးမြတ်ကြသော ပုဂ္ဂိုလ်များအား အရိုအသေပေးခြင်းအမှုကို ပြုလုပ်ကြရမည်ဖြစ်ပါတယ်။

ခေတ်ပညာသင်ကြားပေးနေသော ဆရာ-ဆရာမများအနေဖြင့်လည်း မိမိတပည့်များအား ဂါရဝတရားများ လက်ကိုင်ထားချင်လာအောင် မိမိကစ၍ ရတနာသုံးပါး မိဘဆရာသမားများနှင့် သက်ကြီးရွယ်အိုများအား ရိုသေခြင်း၊ ရှိခိုးခြင်းများပြုလုပ်၍ နားလည်သည်အထိ သွန်သင်ဆုံးမပေးရမည်ဖြစ်သည်။ ရက်ကွက်၊ ကျေးရွာ၊ မြို့နယ် အိမ်ရှိ လူကြီးမိဘများအနေဖြင့် မိမိသားသမီးများအား ငွေကြေးတစ်ပြားမှ မကုန်ဘဲ ကုသိုလ်ရနိုင်သည့် ဂါရဝတရားများ တည်ကိန်းလာအောင် မိမိကစ၍ ရတနာသုံးပါး၊ မိဘဆရာသမားများ နှင့် သက်ကြီးရွယ်အိုများအား အရိုအသေပေးခြင်း၊ ရှိခိုးခြင်းပြုလုပ်ကာ သားသမီးများ ဆုံးမပေးရမည်ဖြစ်သည်။
ယခုအခါ အချင်းချင်း အရိုအသေကင်းမဲ့လာပုံများကို အားလုံးလက်တွေ့ပင်ဖြစ်သည်။ အရင်ကနှင့် လုံးဝမတူတော့တာ သေချာ၏။ ဂါရဝမင်္ဂလာတရားများကွယ်ပျောက်အောင်၊ နည်းပါးအောင်၊ ရိုသေလေးစားမှုနှင့် ပတ်သတ်ပြီး ရရှိသည့် ကုသိုလ်တရားကို ပိတ်ပင်ဟာ မည်သူနည်း၊ ရှေးပဝေသဏီက လူကြီးများလိုက်နာကျင့်သုံးခဲ့သည့် ငွေကြေးတစ်ပြားမှ မကုန်ဘဲရနိုင်သည့် ကုသိုလ်များကို လျှစ်လျှူနေသူဟာ မည်သူနည်းဟု သိလိုပါက မှန်တစ်ချပ်ကိုထောင်ပြီးကြည့်လိုက်ပါ။ မှန်ပေါ်မှာ ထင်လာမည့် မျက်နှာရှင်အား ဂါရဝတရားများ ဆက်လက်ကျင့်သုံးလာနိုင်အောင် ဆုံးမပါဟု တိုက်တွန်းလိုက်ရပါတော့သည်။

အရှင်ဝိမလဝံသ(နာလန္ဒာတက္ကသိုလ်)