ဒိဋ္ဌိ ဟူသော စကားလုံးသည် ပါဠိစကား ဖြစ်သည်။ ၄င်း၏ အဓိပ္ပာယ်သည် မြန်မာစကားအားဖြင့် အယူ၊ အမြင် ဖြစ်ပေသည်။ မှားသောအယူ၊ မှားသောအမြင် ကို မိစ္ဆာဒိဋ္ဌိဟု ခေါ်ပြီး မှန်သောအယူ၊ မှန်သောအမြင် ကို သမ္မာဒိဋ္ဌိဟု ခေါ်သည်။ သာမန်အားဖြင့် နားလည်ထားကြသည်မှာ ဒိဋ္ဌိ ဟု ပြောလိုက်လျှင် မိစ္ဆာဒိဋ္ဌိ ဟုသာ သိကြပေသည်။
ဒိဋ္ဌိ ဟု ပြောလိုက်လျှင် မိစ္ဆာဒိဋ္ဌိ ဟု အဘယ်ကြောင့် သိနေကြသနည်း ဟု ဆိုလျှင် ဗုဒ္ဓအဘိဓမ္မာ၏ အကုသိုလ် စေတသိက်များတွင် မိစ္ဆာဒိဋ္ဌိ ကို ဒိဋ္ဌိစေတသိက်ဟု အမည်တပ်ပေးထားသောကြောင့် ဖြစ်သည်။ ဒိဋ္ဌိ စကားလုံးသည် အကုသိုလ် စေတသိက်များတွင် ပါဝင်နေသဖြင့် မိစ္ဆာဒိဋ္ဌိ ဟုပင် အလွယ်တကူ နားလည်ထားကြပေသည်။
မိစ္ဆာဒိဋ္ဌိသည် အမှားကို အမှန်မြင်သည်။ အမှန်ကို အမှားမြင်သည်။ မမှန်သော နှလုံးသွင်းမှု ရှိသည်။ အနတ္တကို အတ္တ၊ အနိစ္စကို နိစ္စ၊ ဒုက္ခကို သုခ၊ အသုဘကို သုဘ စသည်ဖြင့် လည်းကောင်း၊ ခန္ဓာငါးပါး ရုပ်နာမ် အစုအဝေး ခန္ဓာကိုယ်ကို ငါ ဟူ၍လည်းကောင်း၊ ဖန်ဆင်းသူ မရှိဘဲ ရှိသည်ဟူ၍လည်းကောင်း၊ ကံ ကံ၏ အကျိုးကို မယုံကြည်ခြင်း၊ အကြောင်းကြောင့် အကျိုးဖြစ်ခြင်းကို မှန်ကန်စွာ မသိခြင်း စသဖြင့် ရှုမြင်နေပေသည်။
ထိုကြောင့် အယူမှား၊ အမြင်မှား၊ အမှတ်မှား၊ အသိမှား၊ မှားယွင်းစွာ ရှုမြင်တတ်သဖြင့် ဒိဋ္ဌိ ဟု ခေါ်ရပေသည်။
သုတ္တန်များတွင် ဟောကြားထားသော ဒိဋ္ဌိအမျိုးအစားပေါင်းသည် (၆၂) မျိုး ရှိသည်။ အဆိုးဆုံး ဒိဋ္ဌိများသည် (၃) မျိုးပင် ဖြစ်သည်။ ၄င်းတို့မှာ (၁) နတ္ထိကဒိဋ္ဌိ၊ (၂) အဟေတုကဒိဋ္ဌိနှင့် (၃) အကိရိယဒိဋ္ဌိ တို့ပင် ဖြစ်သည်။
နတ္ထိကဒိဋ္ဌိသည် အကျိုးကို လက်မခံသော အယူဖြစ်သည်။ ကုသိုလ်ပင်ဖြစ်စေ၊ အကုသိုလ်ပင် ဖြစ်စေ ဘာပဲ လုပ်လုပ် ထိုအကျိုး မရှိ ဟု လက်ခံသည့် အယူဖြစ်သည်။ ကောင်းတာလုပ်လည်း ကောင်းကျိုးဆိုတာမရှိဘူး၊ မကောင်းတာလုပ်လည်း အပြစ် မရှိဘူး ဟု ခံယူ စွဲမှတ်ထားခြင်းဖြစ်သည်။ ကုသိုလ် စေတနာ၏ အကျိုးသည် မရှိသလို အကုသိုလ် စေတနာ၏ အကျိုးသည်လည်း မရှိ ဟု အယူမှား၊ အမြင်မှားအား အယူမှန်၊ အမြင်မှန် ဟု လက်ခံထားသည်။
နတ္ထိကဒိဋ္ဌိဝါဒကို လက်ခံထားသူများအား နတ္ထိက၀ါဒီများဟု ခေါ်သည်။ ထိုသူတို့သည် နောင်ဘ၀ မရှိ ဟု ယုံကြည်ထားသူများ ဖြစ်သည်။
နောင်ဘ၀မရှိ ဟု ယုံကြည်ထားသဖြင့် ဒီဘ၀တွင် ကိုယ်ကြိုက်ရာ ကိုယ်လုပ်နိုင်သည် ဟူသော အယူဖြစ်သွားပေသည်။ ကောင်းကျိုး၊ ဆိုးကျိုးအတွက် နောင်ဘ၀ မရှိ ဟု ယူဆထားသောကြောင့် ဖြစ်သည်။ ပုထုဇဉ် မှန်သမျှ ကိုယ်ကြိုက်ရာ ကိုယ်လုပ်ကြ ဟု ဆိုရင် အကုသိုလ်များကို သာ လုပ်ရန် ဆန္ဒမဲသာနေပေသည်။ ကုသိုလ်ရေးတွင် ဆန္ဒမဲပေးရန် ၀န်လေးနေတတ်သည်။
ထိုနတ္ထိက၀ါဒီ တို့သည် မိဘကျေးဇူးကိုလည်း မသိတတ်၊ မိဘတို့သည် အချင်းချင်း ချစ်ကြိုက်ပြီး
မိမိတို့ကို မွေးဖွားလာခြင်း ဖြစ်သဖြင့် ကျေးဇူးတင်ရန် မလို ဟု စွဲမှတ်ထားကြသည်။ ထိုကြောင့် မိဘကျေးဇူးပင် မသိတတ်လျှင်တော့ တခြားပုဂ္ဂ္ဂိုလ်များ၏ ကျေးဇူးတရားများ အတွက်ဆိုလျှင်လည်း မည်သို့မျှ သိတတ်လိမ့်မည် မဟုတ်ပေ။
နတ္ထိကဒိဋ္ဌိ အယူဝါဒကို အကျဉ်းချုံး သုံးသပ် စိစစ်လိုက်လျှင် ကောင်းတာလုပ်သော်လည်း ကောင်းကျိုးမရှိ၊ မကောင်းတာ လုပ်သော်လည်း အပြစ် မရှိ ဟုပင်ဖြစ်သည်။ ထိုကြောင့် နတ္ထိကဒိဋ္ဌိသည် လောကကို ဖျက်ဆီးတတ်သည့် ဒိဋ္ဌိများတွင် တစ်ခု အပါအ၀င် ဖြစ်သည်။
အထက်က ပြဆိုပြီး ဖြစ်သော အဆိုးဆုံး ဒိဋ္ဌိ (၃) မျိုးတွင် ဒုတိယမြောက်သည် အဟေတုကဒိဋ္ဌိ ဖြစ်သည်။
အကြောင်းကြောင့် အကျိုးဖြစ်သည် ဟု ဗုဒ္ဓသည် ဟောကြားထားသော်လည်း အဟေတုကဒိဋ္ဌိသည် အကြောင်းကို ပယ်သော ၀ါဒ ပင်ဖြစ်သည်။ လူဖြစ်လာရသည်မှာ အမျိုးသားနှင့် အမျိုးသမီး အိမ်ထောင်ပြုခဲ့သောကြောင့် လူများကို မွေးဖွားလာရသည်။ ချမ်းသာသည်၊ ဆင်းရဲသည်မှာလည်း အတိတ်မှ ကုသိုလ်၊ အကုသိုလ်ကြောင့် မသက်ဆိုင်ဘဲ လက်ရှိအခြေအနေ ကြိုးစားမှုကြောင့်သာ ဖြစ်သည် ဟု အဟေတုက ဒိဋ္ဌိဝါဒီ လူများက မှတ်ယူထားကြသည်။
ကံ၊ ဉာဏ်၊ ၀ီရိယ သုံးခုတွင် အတိတ်နှင့် ပစ္စုပ္ပန်တွင် ပြုလုပ်ထားသော ကုသိုလ်၊ အကုသိုလ်ကိုကား ထည့်တွက် စဉ်းစားထားခြင်း မရှိပေ။ ဉာဏ်နှင့် ၀ီရိယကြောင့်သာ ဖြစ်သည်ဟု ယုံကြည်ကြသည်။ အတိတ်မှ ကုသိုလ်၊ အကုသိုလ်တို့ကို မယုံကြည်ခြင်းသည် အဟေတုကဒိဋ္ဌိ အုပ်စုတွင် ပါဝင်သွားပေသည်။ အကြောင်းကို ပယ်လိုက်ခြင်း ဖြစ်သည်။
အကြောင်းတရားနှင့် အကျိုးတရားတွင် အကြောင်းကို ပယ်လိုက်ပြီ ဖြစ်သည့်အတွက် အကျိုးတရားပါ ပယ်ပြီးသား ဖြစ်သွားပေတော့သည်။ အကြောင်းကံတရား မရှိဘဲ ကောင်းကျိုး၊ ဆိုးကျိုးများကို ခံကြ၊ စံကြရသည် ဟု မှားယွင်းစွာ ယူဆမိခြင်းကြောင်း အဟေတုက ဒိဋ္ဌိ ဟု ခေါ်ဆိုကြပေသည်။
အကိရိယဒိဋ္ဌိသည် ကုသိုလ်၊ အကုသိုလ် ဆိုသည်မှာ လုံးဝ မရှိ ဟု ယူခြင်း ဖြစ်သည်။ ကုသိုလ်ကံ၊ အကုသိုလ်ကံ တို့သည် မရှိ ဟု အယူစွဲလိုက်သည်နှင့် ကံ ကံ၏ အကျိုးလည်း လုံးဝ မရှိတော့ပေ။ အကြောင်းတရားနှင့် အကျိုးတရားတို့တွင် နတ္ထိကဒိဋ္ဌိ သည် အကျိုးတရားကို ပယ်သည်။ အဟေတုကဒိဋ္ဌိ သည် အကြောင်းတရားကို ပယ်သည်။ အကိရိယဒိဋ္ဌိ သည် ကောင်းမှု၊ မကောင်းမှုကို ပြုသော်လည်း ပြုသည်မမည်၊ ပြုရာမရောက် ဟု မှားယွင်းစွာ စွဲမြင်သော အယူ တစ်မျိုး ဖြစ်သွားသည်။
အကိရိယ ဒိဋ္ဌိဝါဒီ လူများသည် ကုသိုလ်၊ အကုသိုလ်ကံကို ပယ်သော မိစ္ဆာဒိဋ္ဌိများ ဖြစ်သည်။ လောကတွင် ရရှိလာသော ကာမဂုဏ်များဖြင့် ပျော်အောင်သာ နေကြမည် ဖြစ်သည်။ ထိုကြောင့် ကုသိုလ်၊ အကုသိုလ်များကို ထည့်တွက် စဉ်းစားခြင်း မရှိဘဲ လုပ်ချင်ရာသာ လုပ်နေကြတော့သည်။
ဒိဋ္ဌိ၏ သဘော…(၂)... သို့ ဆက်ရန် -
အရှင်ဉာဏဒီပ (ဓမ္မရတနာ)
ဒေလီတက္ကသိုလ်၊ အိန္ဒိယ
No comments:
Post a Comment