ကံ တည်းဟူသော ရေတွေ ခန်းနေပြီ။ ငါး နှင့်တူသော သတ္တ၀ါတွေ သေဖို့နီးနေပြီ။
သေခါနီး ပျော်ပျော်နေတယ်ဆိုတာ ခေါ်လို့ ကောင်းပါ့မလား။ အခုအချိန်ဟာဖြင့် မသေရာရှာဖို့
အချိန်ရောက်ပါပြီ။ သေတာ ထုံးစံပဲလို့ဘဲ ပြောမနေပါနဲ့အုံး။ မသေရာလည်း လမ်းခွဲရှိနေတယ်ဆိုတာ သတိထားပါအုံး။ သူတော့သေပြီ ငါတော့ မသေရာရှာမယ်ဆိုတဲ့ စိတ်ကူးပါအုံး။
(ကျေးဇူးတော်ရှင် မိုးကုတ်ဆရာတော်ဘုရားကြီး၏ ဆုံးမစာ)
အားမှသေမှာလား၊ သေမှအားမှာလား…
ကမ္ဘာပေါ်မှာ နေ့စဉ်နဲ့အမျှ လူတွေ မရေမတွက်နိုင်လောက်အောင် သေနေကြတာ အားလို့ သေတဲ့မသာ တစ်ယောက်မှ မရှိပါဘူး။
မအားတဲ့ ကြားက သေသွားကြတဲ့ မသာတွေချည်းပါပဲ။
သေမင်းက သူခေါ်ချိန်တန်ရင် အားတဲ့သူကိုလည်း ခေါ်မှာပါ။ မအားတဲ့သူ ကိုလည်း ခေါ်မှာပါ။
သေမင်းမှာ တပည့်မွေးပြီး လူရွေးတဲ့မူ မရှိပါဘူး။
ဒီတော့ မအားတဲ့ကြားထဲက သေမင်းလာခေါ်ရင် အချိန်မရွေး လိုက်သွားရမှာပဲ ဆိုတာကို ကြိုတင်ပြီးတာ့ နှလုံးသွင်း ဆင်ခြင်ထားမယ် ဆိုရင် မအားလို့ပါ ဆိုတဲ့ အကြောင်းပြချက်နဲ့ တရားဓမ္မကို မျက်နှာလွှဲတဲ့ အဖြစ်ကို ရောက်မှာ မဟုတ်တော့ဘူး…
(အရှင်ဆန္ဒာဓိက – ရွှေပါရမီတောရ)
ကိုယ်ကျိုးမနည်းဘူးလား…
အားမှလုပ်မယ်၊ အားမှလုပ်မယ် ဆိုပြီး
အားရက်စောင့်မယ် ဆိုလို့ရှိရင်
“ခေါင်း” ထဲ ၀င်တဲ့ နေ့ပဲ။
ဒီလိုဖြစ်ရင် အားရက်ကို မစောင့်နဲ့တော့။
ဒီကနေ့သည် ကိုယ့်အတွက်။
မနက်ဖြန်သည် ကိုယ့်အတွက် မဟုတ်ဘူးလေ။
အနာဂါတ် ဆိုတာ မသေချာဘူးတဲ့။
ကွေးသောလက် မဆန့်ခင် ဆန့်သောလက် မကွေးခင် ဆိုသလို
ညသေသွားရင် ဘယ့်နှယ်လုပ်မလဲ။
ကိုယ်ကျိုးမနည်းဘူးလား….
(အောင်ဆန်းဆရာတော်)
ကျင့်ကြံအားထုတ်ရန်…
- မိမိရဲ့ ရခဲ့တဲ့ လူ့ဘ၀ကို အလွဲသုံးစား အချိန်တွေနဲ့ မဖြုံးလိုက်ပါနဲ့။
- ခန္ဓာကိုယ်ဟာ မွေးကတည်းက အသေဘက်ကို ပြေးနေတယ်။
- ဘယ်ဗေဒင်မှ မယုံကြနဲ့၊ ခန္ဓာက သူ့လမ်းသူ ပြေးနေတော့
မနေ့ကထက် ယနေ့ သေဖို့ တစ်ရက် နီးသွားပြီဆိုတာသာ ယုံလိုက်ပါ။
- ခန္ဓာ၏ ၀တ္တရားက အသေရှာတာ၊ ဉာဏ်၏ ၀တ္တရားက အသေရှောင်တာ။
- ခန္ဓာက အပြေးသွားနေတော့ အသေကဦး၍ ဉာဏ်က နောက်ကျသွားလိမ့်မယ်။
- အပြေးမရပ်တဲ့ ခန္ဓာကိုယ် သုဿန်မရောက်ခင် မဂ္ဂင်အလုပ် မြန်မြန်လုပ်ပါ။
- အသက်တမ်း ခပ်တိုတိုလေးမှာ ခပ်ခိုခို လုပ်နေမယ် ဆိုရင် အသေစောသွားရင်
ကိုယ်ကျိုးနည်းလိမ့်မယ်။
- သာသနာနဲ့ ကြုံမှ သစ္စာလေးပါး ထွက်မြောက်ရေးတရား ပေါ်တယ်။
- ယခုအချိန်ဟာ အားလုံး အဖက်ဖက်မှ ကြုံပြီး ကျွတ်တမ်းဝင်ရမယ့် ဘ၀ပဲလို့
ဆုံးဖြတ်ချက်ချပြီး အလုပ်သာ လုပ်ပါ။
(မိုးကုတ်ဆရာတော်ဘုရားကြီး)
No comments:
Post a Comment